أحد الغربية بعيدة عن كل تأهيل !
احد الغربية جماعة قروية بعيدة عن مدينة اصيلا ب 10دقائق وعن مدينة طنجة ب40دقيقة وعن مدينة تطوان بحوالي ساعة ونصف ...جماعة كتعيش قدرها كباقي الجماعات القروية المغربية اللي كتعاني التهميش والنسيان ...جماعة كانوا مسلطين عليها منتخبين همهم الوحيد هو خدمة المصلحة الفردية ولا شيء غير ذالك ...وحتى نهار كان كيبغي شي رئيس يعمل شي تخربيقة كان كيفكر فالحصة ديالو ..واللي شاط عاد كيفكر يعمل بيه هاد التخربيقة ...الانتخابات الاخيرة شكلت منعطف مهم وحاسم والفضل كلو لفئة الشباب لي مشات تختار الناس لي كتبغي ..وكان الاختيار موفق حيت لأول مرة فتاريخ هاد الجماعة كنلقاو مكتب مشكل من شباب ...قبل ما ينجحو فهاد الانتخابات كانو كيمارسو شغبهم الجميل فمراقبة المجالس السابقة ...ف9 شهور ديال المسؤولية بينو على حماس وغيرة كانت مفقودة لدى كل الانتهازيين السابقين...فبعد تنسيقهم مع احدى الوحدات الصناعية بمدينة طنجة قدرو يمنحو فرص شغل لعدد مهم من شباب المنطقة من ذوي الشهادات والدبلومات ...خصوصا وأن هاد الوحدة الصناعية في حاجة ل 400شاب من أبناء المنطقة ...كما أنهم فالاجراءات الأخيرة لربط دواوير الجماعة بالماء الشروب وتمكين الساكنة بربط فردي و بأثمنة رمزية ...هاد الشي كلو مزيان ..ولكن الجميل هو اصلاح مقطع طرقي يصل الجماعة بالطريق الوطنية رقم 1 ...جميل حيت خرج بزاف د القنافذ من جحورها ...كان يقدر يكون عمل عادي كيدخل ضمن مسؤوليات المجلس ...ونتيجة طبيعية للعمل ديالو فتنفيذ الوعود لي كان قاطعها مع الساكنة لي تاقت فيه ...ولكن شي خوت محسوبين على حزب الخوانجية ولي بقاو فأورجو فالانتخابات الأخيرة ..يمكن اسفزتهم الوتيرة لي غادين بها هاد الشباب فتأهيل المنطقة ديالهم ...وبداو كيعبرو على حقد دفين عندهم وهوما كيحاولو يقلبو على شي نقائص فمشروع تأهيل مقطع طرقي المساحة ديالو لا تتعدى 3 كيلومترات...ما لقاو منين يدوزو خصوصا وأن الساكنة عبرت عن ارتياحها من انتهاء معاناة دامت لعقود ( الطريق من فترة الاستعمار )...كل ردود الفعل كانت ايجابية ..فقط الخوت لي كانو كيراهنو على حريرة رمضان باش يستقطبو بعض البسطاء ..شافو بلي البساط بدا كيفلت من تحتهم ..خصوصا وأن الشباب لي كان عندهم دور حاسم كيف ما قلنا ..كيهمهم أكثر يشوفو شي حاجة زوينة فبلادهم ..كيهمهم أكثر الفعل ..اما الشفوي والحريرة ما بقاوش واكلين ...أغرب رد فعل على هاد المشروع واللي نجزاتو الجماعة بامكاناتها على تواضعها ومحدوديتها ..هو الصادر عن أحد المحسوبين على حزب الخوانجية لي قال : تاهيل هاد المقطع الطرقي بالشكل لي تم بيه اهدار للمال العام ..وكان على المجلس يكتفي بترقيع البؤر السوداء ؟؟؟؟؟؟؟؟؟؟ دابا هادا واش تعطيوه ليه ؟ اولا نعطيه ليه أنا ؟؟ ملحوظة : أنا لا أنجز دعاية لحتى شي جهة ..وما منخارط حتى فشي حزب ( حيت موقفي من الاحزاب هذا كلام اخر ) ولكن كتبت حيت بكل بساطة كنبغي هاد المنطقة لي تزاديت وتربيت فيها ...واي واحد دار شي مزية ليها أنا معاه ..وأي واحد بغا يفكر فيها بالقباحة ما نعقلشي عليه...